FLORENTINO GOIBURU BERTSOPAPER LEHIAKETAKO BERTSO SARIDUNAK

 Joan zen Igandean, otsailaren 4ean, egin zen FLORENTINO GOIBURU BERTSOPAPER LEHIAKETAKO sari banaketa. 
Bertan hiru sari banatu ziren, helduen kategoriako bi bertso sorta onenak eta herriko bertso sortarik onenarena.
Lanik onenaren saria INFLU-EZER bertso sortak eraman zuen, Iñigo Legorburu Hernaniarrak eginak. 

INFLU-EZER. Doinua: Gure lurrean hedatua da 

1   

Kaixo, ni Mega Johann nauzue

atzo nintzena Joanes

jarraitzen nauten haiekin bete

ditzaket mila San Mames.

Trukatzean bizi-planez,

gaur nabil amets buhamez

frikia zena ikono berri

bihurtu baita, aidanez …

Filtrorik gabe esanez:

“Ez segi loser izanez!”

Zuek niretzat jardun zaitezten

aldatu berri dut lanez. (BIS)

 

3

Txutxumutxutan hasitakoan

iristen gara Cuore-ra

gure begiak eginda daude

matxismoaren moldera:

“Neskek, kiloak sobera”

“Aiton galaiek, hobera”

haien bizitzek ze arrakasta

igotakoan blogera!

Aniztasun kolorera

apusturik ez morera!

Mikromatxismoz osatu ahala

suntsitu dadin norbera … (BIS)

 

5

Garai bateko elizetako

pulpitoak zeuden goian

Jesukristoren hitza hartzeko

bazen nahiko arrazoi, han.

Mugikorraren sasoian

herriko kale kantoian

edonor bihur liteke laster

gure otoitzen morroian …

Hain tonu aurrerakoian

sartzen diegun pozoian

gaur burumakur umiltzen dira

telefonoko sermoian. (BIS)

2

Mundura jartzen gaitu begira

gure jardun urduriak

txunditzen gaitu reggetoi txarrak

edo Brasilgo cumbiak.

Dantzari sexy, guriak

erakutsiz ipurdiak

“probintzianismoz ez zaitez jantzi!”

diolako liturgiak …

Nazka Rahm-ek, Ezkurdiak

Xibero ta Lapurdi at

Euskal Herria alferrik dauka

guretzat mapa-mundiak. (BIS)

 

4

Obsesionatzen gaitu erabat

eskalan gora jotzeak

gogoz onartzen ditugu hortaz

tribuko kode mortseak:

Urre gorrizko brotxeak,

zilarrak edo brontzeak

ai, hainbeste lan dakar berekin

espektatibak sortzeak!

Gama altuko kotxeak

BMW ta Porscheak

askatasuna ematen digu

kapitalari lotzeak. (BIS)

 

6

Indarra hartzen dihardu gure

influezerron lobby-ak

baina elite deitzen den hortan

badira kategoriak:

Story hot ta goriak,

reggetoizko melodiak

garun txokotan sailkatzen ditu

norberaren memoriak.

Horren ahalegin joriak

baietz eskertu zoriak!

Historiara pasa daitezen

gure gaurko story-ak! (BIS)

Lehiaketako bigarren saria egile berak eraman zuen, Iñigo Legorburuk, ESAN GABE DOA izeneko sortarekin:

ESAN GABE DOA. Doinua: Ke azpitik, su gainetik

1 

Gelako isilena zen

neska hura parkean

gaur ez dago bakean

publikoan jarduteko

lantxo bat bapatean

baitu eskuartean …

Atzo izan nintzen haurrak

hor dirau itzalpean

hitzik ez aldartean

mututasuna gorpuzten

hasten den bitartean. (BIS)

 

 

2

“Oholtzara igo orduko

baietz jaso epaia!”,

“lotsa, zure etsaia”

halako mezu gogorrek

handitzean ezbaia

ximeltzen zait bisaia.

Atrebentzia ez al da

akatsaren anaia?

Hasterako … amaia!

Gauza bat da esanahia,

bestea esan nahia … (BIS)

 

 

3

Ondotxo dakigun arren

ez garela hitz hutsak

hurkoaren hizkuntzak

sarri bilakatzen gaitu

tentelak, harroputzak

ukituz bihotz zuntzak …

“Pertsonak gorputzak gara!”

Dion arren hezkuntzak

ahazten zaizkigu funtsak …

Beraz zergatik mututzen

dira gure gorputzak? (BIS)

 

 

 

4

Bizitzak gu isiltzeko

badituenez planak

jartzen ditu afanak

gure baitan betirako

sarri utziz aztarnak

ta zuzentzen, ze lanak!

Ez al dira bertikalak

munduko harremanak?

Ze pisu, iraganak:

Esanekoak izanda,

ahazteraino esanak! (BIS)

 

 

5

Izua eragiten dit

jendaurrean hasteak

hitz hutsekin janzteak

nirea ez den rol batez

lagunei itsasteak

ta buru eskasteak.

Beldurtzen nau plazandreen

kodeak ikasteak

nolako kontrasteak

librean jardunagatik

ez baikara askeak. (BIS)

 

 

6

Aurretik asko prestatu

naizenaren bermean

adinik onenean

aurkitzen naizela ongi

dakit nik azkenean

lanaren izenean!

Gurasoen begirada

nabari dut erne han,

ze poza barrenean!

Zeinu hizkuntzan hizketan

ikusten nautenean! (BIS)

Herriko bertso sortarik onena ALOÑA GALARRAGAk egindako ZINTZARRI HOTSEZ izeneko bertso sortarentzat izan zen.

ZINTZARRI HOTSEZ. Doinua: Eguna pasa nekean eta

1

Idiazabalgo Nafarrasasti

erdikon gendun jaioa

mila beatziehun ta hoitamahirun

etorri zan mutikoa

Ixil samarra azaldu ohi zan

ta beidatue fijoa

Goiburu ta oiarbidetarrak

bezelakoxe iaioa

 

2

Ezpañek estu tolostatzeko

ohitturea zeuken gorra

kopeta zabal antxekoa ta

agerin beti tontorra.

Tartea hartu nahi izaten tzon

kontuk esateko horra,

ditxolarie aparta zan da

etzan batere elkorra.

 

3

Hitz egiten zun dotore eta

kantuako zan txorie

erantzune zon zorrotza eta

gorde itten tzon egie.

Uztapide ta Zepai zanakin

plazan hartu zon hapie

Iraola ta Igartzabalen

pauso motxeko erbie.

 

4

Urbi aldean artzai lanetan

eman bide zon maillea

bertso zaharrak ikasi eta

bekasako makillea.

Pastajo pixkat zeukan behorrai

jarriko zion sillea

hargin lanetan e ibilie

jakinmiñe zon pillea.

 

5

Urbin egin zon gazte garaia

gero fabrikan zan hasi

itxura danez negu partean

mendin eitten zon luzetsi.

Makinan aurren ordupen berriz

uztea nahiago kasi

ahozkotasunetik edanez

bertsotan ein zon ikasi.

 

6

Kategoriko bertsolarie

txuxen, poliki ta juxtu

axari arten oraindik behintzet

bere parekorik eztu.

Florentinoren ibilbidea

ez dezagun iñork ahaztu

haren bersoak zintzarri hotsez

egin ditzagun abestu!

ZORIONAK BIOI ea ESKERRIK ASKO PARTE HARTZAILE GUZTIOI.